«Պոպուլիստները, որ գալիս են իշխանության, զավթում են ամեն ինչը»,- այս մասին այսօր լրագրողների հետ հանդիպման ընթացքում նշեց «Վերնատուն» հասարակական-քաղաքական ակումբի նախագահ Վազգեն Մանուկյանը։
Մանուկյանի խոսքով, պոպուլիստները նախ և առաջ ցանկանում են իրենց ձեռքը վերցնել դատական համակարգը. «Քանի որ գործադիրը նիրենց ձեռքում է, ԱԺ-ն էլ իրենց ձեռքում կլինի։ Իսկ դատականը անկախ է։ Եվ այն դեպքերում, երբ դատական համակարգը իրենց ձեռքը վերցնել չի լինում, ապա իրենք ամեն ինչ անում են՝ պարալիզացնելու դատական համակարգը»։
Վերոնշյալ երևույթը, Մանուկյանի համոզմամբ, Հայաստանում բացահայտ տեսանելի է։
Բացի այդ, պոպուլիստները, գալով իշխանության, իրենց հռչակում են ժողովրդի ներկայացուցիչ, և չեն ընդում ժողովրդի այն հատվածի կարծիքը, որ իրենցը չի։ Մանուկյանի խոսքով, նշված դեպքում էլ այդ կարծիքը անվանում են նախկինների, ժողովրդի թշնամիների, կամ ծախվածների կարծիք։
«Էն մասը, որ իրենց ձայն է տվել, ժողովուրդ է, մյուս մասը՝ ժողովուրդ չի։ Եվ երկրում կամաց-կամաց պակասում են այլընտրանքային կարծիքները, բազմակարծությունը նվազում է։ Սա ևս մենք Հայաստանում բացահայտ տեսնում ենք»,- նշեց Մանուկյանը։
Պոպուլիզմի երրորդ բնութագրիչն այն է, որ իրեն ժողովրդի փրկիչ հռչակած մարդը որևէ կերպ չի ցանկանում հանձնել իշխանությունը, լինի դա ընտրությունների թե հեղափոխության միջոցով։
Մանուկյանի խոսքով, դա էլ իր հերթին բերում է քաղաքական-տնտեսական-ֆինանսական նոր կոռուպցիայի՝ յուրայիններին կարելի է ամեն ինչ, իսկ թշնամիների հետ խոսում են դատարանների և օրենքի միջոցով։
«Կոռուպցիան աճում է, դրա հովանավորչությունը ևս։ Սա Հայաստանում դեռևս բացահայտ չենք տեսնում։ Նշույլները կան, բայց դեռ բացահայտ չենք տեսնում։ Այսինքն՝ պոպուլիստների՝ իշխանություն վերցնելը ցանկացած երկրում լինում է այս երեք կետերով»։
Բայց Հայաստանում միայն պոպուլիստները չեն իշխանության։ Վազգեն Մանուկյանի պնդմամբ, իշխանության են նաև նեոլիբերալները. «ՀԿ-ները, որ Հայաստանում ստեղծվեցին՝ դրսի գրանտներով, ես կարծում եմ, որ դրանցից շատերը դրական դեր կատարեցին, որովհետև մեր հասարակությունը աշխարհի շատ խնդիրների ծանոթ չէր։
Բայց կամաց-կամաց այդ գրանտներով քարոզվում է մի գաղափարախոսություն, որը նաև քարոզվում և իրականացվում է Հայաստանում։ Դա հակաազգային լիբերալիզմ է, հակացիվիլիզացիոն լիբերալիզմ։ Այդ քարոզչությունը ոչ միայն մեզ համար վտանգավոր է, կարևոր է նաև այն, որ դա առաջնահերթ չի։ Աշխարհում հիմա հակառակ հոսանքն է զարգանում՝ հականեոգլոբալիզմի շարժումը։ Հիմա Հայաստանում իշխանությունը պոպուլիստների և նեոլիբերալիստների ձեռքում է»։
Մանուկյանի խոսքով, այս դեպքում հարկավոր է դիմադրել բոլոր այն քայլերին, որոնք քանսդում են ազգային ր ժողովրդավար սյուները։ Ըստ նրա, պոպուլիզմը դեմ է ժողովրդավարությանը, իսկ նեոլիբերալիզմը՝ ազգայինին։
«Այն 2 սյունը, որի վրա պետությունը կառուցված է, մենք կորցնում ենք։ Դրա դեմ պետք է պայքարել։ Պետք է չվախենալ բանավիճելուց։ Հիմա մեր հասարակությանը թույլ վիրուս են սրսկել, և դրա շնորհիվ մեր իմունային համակարգը պետք է ստեղծի հակամարմիններ, որպեսզի այդ հիվանդությամբ ապագայում չհիվանդանանք։ Հիմա Հայաստանում պետք է ստեղծվի միջին շերտ՝ արվեստաբաններից, բիզնեսմեններից, մշակութաբաններից, ռազմական, կրոնական և քաղաքական գործիչներից կազմված, որ պայքարի այս ամենի դեմ։ Մենք պետք ստեղծենք շերտ, որը Հայաստանը կպահպանի ցնցումներից»,- նշեց Վազգեն Մանուկյանը։