ԱՄՀ Գործադիր խորհուրդն ավարտել է ՀՀ-ի հետ «Սթենդ-Բայ» վարկային պայմանավորվածության առաջին ամփոփումը:
Այս առնչությամբ, Հայաստանի Կենտրոնական բանկի տարածած հաղորդագրության մեջ ասվում է.
• Չնայած բյուջեի գերակատարմանը՝ բարեփոխումների թափը պահպանելը կարեւոր է եկամուտների հավաքագրումն ամրապնդելու, այդ թվում` գույքի հարկման ոլորտում բարեփոխումներն ավարտին հասցնելու համար:
• Իշխանությունների բարեփոխումների օրակարգի իրականացումը, այդ թվում՝ կոռուպցիայի դեմ պայքարի համապարփակ համակարգ ստեղծելու միջոցով կառավարման բարելավմանն ուղղված ջանքերը, կամրապնդեն կայուն եւ ներառական աճը:
2019 թ. դեկտեմբերի 20-ին ԱՄՀ Գործադիր խորհուրդն ավարտել է «Սթենդ-Բայ» վարկային պայմանավորվածության շրջանակում Հայաստանի Հանրապետության կատարողականի առաջին ամփոփումը: 36-ամսյա այս վարկային ծրագիրը՝ 180 միլիոն ՓՀԻ (մոտ 248.2 միլիոն ԱՄՆ դոլար) ֆինանսավորման ընդհանուր հնարավորությամբ, որը համարժեք է ԱՄՀ-ում Հայաստանի քվոտայի 139.75 տոկոսին, ԱՄՀ Խորհրդի կողմից հաստատվել է 2019 թ. մայիսի 17-ին (տե՛ս Մամլո հաղորդագրություն No. 19/173):
Հայաստանի իշխանությունները շարունակում են «Սթենդ-Բայ» վարկային պայմանավորվածությունը մինչեւ իր ավարտը՝ 2021 թ. մայիսի 16-ը, դիտարկել որպես նախազգուշական եւ մտադիր չեն այն օգտագործել, եթե չնախատեսված տնտեսական ցնցումների հետեւանքով վճարային հաշվեկշռի հետ կապված խնդիրներ չառաջանան:
Գործադիր խորհրդի քննարկումից հետո, Կառավարիչ տնօրենի տեղակալ եւ նախագահի պաշտոնակատար պրն. Միթսուհիրո Ֆուրուսավան հանդես եկավ հետեւյալ հայտարարությամբ.
«Հայաստանի տնտեսական ցուցանիշներն ուժեղ են առողջ աճով, ցածր գնաճով, կայուն ֆինանսական համակարգով եւ բարելավվող արտաքին ու հարկային բուֆերներով: Պետական պարտքը շարունակում է մնալ նվազող հետագծի վրա, եւ ակնկալվում է, որ Հայաստանն իր միջնաժամկետ պարտքի թիրախին կհասնի սպասվածից մի քանի տարի շուտ: Այս նպաստավոր հանգամանքը հնարավորություն է տալիս արագացնել բարեփոխումներին ուղղված ջանքերը` ի սատարումն առավել հավասարակշռված եւ ներառական աճի, աղքատության կրճատման եւ գործազրկության նվազման նպատակի: 2019 թ. բյուջեն գերակատարվել է՝ գրանցելով ինչպես ակնկալվածից ավելի եկամուտներ, այնպես էլ սպասվածից քիչ կապիտալ ծախսեր: Կապիտալ ծախսերի արդյունավետ իրականացումը՝ պետական ներդրումների կառավարման սահուն գործընթացին համահունչ, շարունակում է մնալ առաջնահերթություն: Չնայած հարկաբյուջետային գերակատարմանը, բարեփոխումների թափը պահպանելը կարեւոր է եկամուտների հավաքագրումը բարելավելու, այդ թվում՝ գույքի հարկման ոլորտում բարեփոխումներն ավարտին հասցնելու եւ հարկային վարչարարությունն ուժեղացնելու համար: Բյուջետային գործընթացի խթանումը նաեւ հետագայում կապահովի վստահությունը հարկաբյուջետային կանոնի նկատմամբ:
Գների կայունության ապահովմանն ուղղված դրամավարկային քաղաքականությունը նպաստում է տնտեսական աճին: Իշխանությունների կողմից Բազել III-ի միջոցառումների իրականացումը կբարձրացնի ֆինանսական համակարգի կայունությունը, ընդ որում՝ ողջունելի են նաեւ կապիտալի շուկայի զարգացմանը եւ ֆինանսների հասանելիության բարելավմանն ուղղված ծրագրերը:
Իշխանությունների բարեփոխումների օրակարգի իրականացումը կնպաստի կայուն եւ ներառական աճին: Կոռուպցիայի դեմ պայքարի համապարփակ համակարգ ստեղծելու միջոցով կառավարումը բարելավելու ջանքերը շարունակական են: Իշխանությունները վերահաստատել են նաեւ սոցիալական ապահովության ցանցն ընդլայնելու եւ այն առավել հասցեական դարձնելու միջոցով բնակչության առավել խոցելի խավերին պաշտպանելու իրենց հանձնառությունը: Մարդկային կապիտալի ամրապնդմանն ու կանանց աշխատուժի մասնակցության բարձրացմանն ուղղված քայլերը իշխանությունների երկարաժամկետ կառուցվածքային օրակարգի առանցքային կետերից են»: