ՀՀ երկրորդ նախագահ Ռոբերտ Քոչարյանի համախոհներն այսօր հավաքվել էին Երևանում՝ ևս մեկ անգամ իրենց աջակցությունը հայտնելով նրան: Նրանք վստահ են, որ Ռոբերտ Քոչարյանն ազատության մեջ է լինելու:
«365 օր Ռոբերտ Քոչարյանն ապօրինի կալանավորված է: Այս մեկուկես տարում մենք սովորել ենք պաքարի տարբեր ձևեր: Մենք ավելի քան 65 հազար ստորագրություն ունենք, մեզ են միացել Հայաստանի բոլոր մարզերից, Արցախից, մեր հայրենակիցներն աշխարհի տարբեր անկյուններից»,- ասաց Ռ.Քոչարյանի աջակիցներից փաստաբան Վահե Եփրիկյանը:
ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողմոնյանն ասաց, որ դեռ շատ աշխատանք ունեն անելու:
«Այն պայքարը, որը սկսել ենք, ոչ ոք չի պատրաստվում կիսատ թողնել: Մենք շարժվելու ենք առաջ, վստահ եմ, որ անելու ենք միասին ու բոլորից լավ»,- նշեց նա:
Միջոցառմանը ներկա էր Ռոբերտ Քոչարյանի որդին՝ Լևոն Քոչարյանը: Նա իր և ընտանիքի անունից շնորհակալություն հայտնեց աջակիցներին:
«Հասկանում եմ, թե ինչերի միջոցով կարող եք անցել, ինչեր են փորձում անել, ինչպես են փորձում կոտրել ձեզ, բայց ուժեղ եք ու շարունակում եք ձեր պայքարը»,- ասաց նա:
Լևոն Քոչարյանը հայտնեց, որ հայրն, իմանալով այս հավաքի մասին, որոշել է ուղերձ հղել: Նա կարդաց Ռոբերտ Քոչարյանի ուղերձը.
«Հարգելի բարեկամներ, ողջունում եմ ձեզ և այսօրվա միջոցառումը: Ուզում եմ նախևառաջ իմ երախտագիտությունը հայտնել ձեզ ձեր հստակ դիրքորոշման, քաղաքացիական քաջության ու պարզ բառով ասած՝ տղամարդկության համար: Շնորհակալ եմ ձեզ։ Դուք ու ձեզ նման մարդիկ են, որ կերտել են Հայաստանի ու Արցախի նորագույն ու հերոսական պատմությունն՝ իրենց քաջության ու սկզբունքայնության շնորհիվ:
Ընդամենը մեկ տարի առաջ հնարավոր չէր նույնիսկ ենթադրել, որ մեր երկրում նորից քաղաքական իմաստ ու արդիականություն կստանա «Միացիր» կոչը: Եթե երեք տասնամյակ առաջ այն կոչ էր հայ ժողովրդի երկու բաժանված հատվածների միացման, ապա այսօր այդ կոչը միավորում է ապազգայնության, իրավական բեսպրեդելի, պատմության նենգափոխման ու անձնիշխանության դեմ պայքարողներին: Ցավում եմ, որ այսպիսի զուգահեռ կա, սակայն դա է ճշմարտությունը։
Ուզում եմ իմ երախտագիտությունը հայտնել բոլոր նրանց, ովքեր ստորագրել են հայտնի «հարյուրի» հայտարարությունը։ Տասնյակ հազարավոր մարդկանց մասնակցությունը պարտավորեցնող է, և ստիպում է ինձ պայքարել կրկնակի եռանդով և չընկերկել որևէ դժվարության առաջ։ Ուզում եմ իմանաք՝ բանտախուցն ընկալում եմ որպես աշխատասենյակ, որտեղ աշխատում եմ հանուն Հայաստանի լավ ապագայի, այն ապագայի, որտեղ կհարգվեն մեր ազգային արժեքները, մեր ինքնությունը, ուր մենք կապրենք առանց կեղծիքի ու ստի, անամոթ պոպուլիզմի, կապրենք արժանապատիվ կյանքով, կզարգանանք՝ չզիջելով մեր ամենամեծ ու նշանակալի ազգային նվաճումը՝ մեր հաղթանակը:
Վստահ եմ, որ նորաստեղծ «Ազատության» հանձնախումբը կարող է դառնալ այն կառույցը, որը կմիավորի ոչ թե մեկ մարդու ազատության համար պայքարող մարդկանց, այլ բոլոր նրանց, ում թանկ է Հայաստանի ու Արցախի ապահով ու բարեկեցիկ ապագան: Սկսվում է քաղաքական պայքարի նոր փուլ, հաջողություն եմ մաղթում բոլորիս այդ պայքարում, համոզված եմ, որ ամեն ինչ լավ է լինելու: Շնորհակալություն»։