«Լրագրողներ հանուն մարդու իրավունքների» ՀԿ-ի նախագահ, իրավապաշտպան Ժաննա Ալեքսանյանն ահազանգում է՝ զինծառայող Արթուր Աջամյանի մահվանից մեկ ամիս անց ձերբակալված չկա։
«Զինծառայող Արթուր Աջամյանի մահվան գործով հարազատների ընդվզումը բնական է և հասկանալի։ Տղայի մահվան համար պատասխանատուներ չկան, գոնե մի վաշտի հրամանատար, ինչպես պահանջում էին հարազատները։ Եվ չի լինելու։
Քննչական կոմիտեն ՊՆ-ի հետ համատեղ արդեն իսկ ունի նախապես գծած սցենարը, սպասում են, որ զինծառայողի հարազատները հանդարտվեն և շարժվեն ըստ այդ պլանի։ Ոչ մի բացահայտում չի լինելու, քանի դեռ չեն ջարդել այդ հանցավոր համակարգը։ Իսկ ջարդող կարծես թե չի լինելու։
Վարչապետը փորձում էր արդարացնել համակարգին՝ նշելով նախաքննության գաղտնիությունը, սակայն տուժող կողմը լիարժեքորեն իրավունք ունի օգտվել իր բոլոր իրավունքներից, սպանությունից գրեթե մեկ ամիս անց անգամ ձերբակալված չունեն»,-գրել է Ալեքսանյանը ֆեյսբուքյան իր էջում։
Հիշեցնենք, որ մահացած զինծառայողի հարազատներն այսօր կառավարության շենքի դիմաց արդարություն էին պահանջում։ Ավելի վաղ նրանք նույն պահանջով ԱԺ շենքի դիմաց էին։