Զարմանալի էր Սահմանադրական դատարանի նախագահ Հրայր Թովմասյանի նկատմամբ չհեռանալու մասին ստորագրությունն ընտրել խափանման միջոց: Ինձ շատ զարմացրեց դա, որևէ մեկը կարծում է՝ Հրայր Թովմասյանը փախուստի՞ պետք է դիմեր, ծիծաղելի է: Այս մասին Tert.am-ի հետ զրույցում ասաց միջազգային իրավունքի մասնագետ Արա Ղազարյանը:
«Ծիծաղելի է ՍԴ դատավորի նկատմամբ խափանման միջոց ընտրել՝ ստորագրություն չհեռանալու մասին։ Պետք է հաշվի առնել, որ խոսքը Սահմանադրական դատարանի դատավորի մասին է։ Ինչ-որ մեկը կարծում է, որ Հրայր Թովմասյանը փախուստի՞ պետք է դիմեր, ծիծաղելի է»,- ասաց Ղազարյանը և հավելեց, որ սա արդեն անօրինականության հարց է։
Ըստ բանախոսի՝ Հրայր Թովմասյանի նկատմամբ չպետք է կիրառվեր որևէ խափանման միջոց: Ինչ վերաբերում է մեղադրանքի առաջադրմանը, ապա ըստ Ղազարյանի, կարծես թե օրենքի տառը պահպանված է. «Սակայն Հրայր Թովմասյանի մասին շատ անձնավորված հայտարարություններ են հնչեցվել, որը թույլ է տալիս մտածել, որ այս ամենը զուտ քրեական դատավարություն չէ, այլ ուղղակի արվում է նրան պաշտոնից հեռացնելու համար»։
Անդրադառնալով հարցին, թե ինչո՞ւ նախագահ Արմեն Սարգսյանը ստորագրեց «Սահմանադրական դատարանի մասին» սահմանադրական օրենքում լրացումներ կատարելու մասին օրենքը, Ղազարյանը պատասխանեց, որ սպասելի էր, որ նախագահը պետք է ստորագրեր։
«Ինչո՞ւ չպետք է ստորագրեր։ Նախագահի լիազորություններն էին։ Ընդհանրապես նախագահը պետք է լիներ արբիտրի դերում, բայց այս դեպքում նախագահը այնքան էլ հակված չէ գործադիր իշխանությանը հակառակ որոշումներ կայացնելուն»,- նշեց նա։
Հիեցնենք, որ երեկ Հատուկ քննչական ծառայությունում քննվող քրեական գործի շրջանակներում մեղադրանք է առաջադրվել ՍԴ նախագահ Հրայր Թովմասյանին ՀՀ ՔՕ-ի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ:
Երեկ լրագրողների հետ զրույցում Հրայր Թովմասյանը, անդրադառնալով իրեն առաջադրված մեղադրանքին, ասաց. «Այն, որ մի օր մեղադրանք է առաջադրվելու ինձ, վեց ամիս առաջ դրա մասին զգուշացրել էին, որ իքս, իգրեկ, զեթ քայլերը չանելու համար Ձեզ մի օր մեղադրանք կառաջադրվի: Մի օր կխոսեմ այդ ամենի մասին, իսկ իքս, իգրեկ քայլերը հրաժարական տալն էր: 308-ի երկրորդ մասով ինձ մեղադրանք առաջադրելը ոչ մի բան իմ կյանքում չի փոխել և չի կարող փոխել: Մենք քննիչի հետ բաժանվեցինք որպես պրոֆեսիոնալներ և ես իրան ասացի, որ որպես պրոֆեսիոնալ իրեն գնահատում եմ, բայց ցավում եմ, որ ինքը ներգրավված է ոչ թե իրավական, այլ՝ քաղաքական պրոցեսների մեջ»: