Հունվարի 6-ին Կոնդի եկեղեցու բակից ապօրինի զենք-զինամթերք պահելու կասկածանքով Ոստիկանության Կենտրոնական բաժին բերման ենթարկված քրեական հեղինակությունը Արտյոմ Կանեվսկոյն էր։ Արտյոմ Կանեվսկոյի փաստաբան Հովսեփ Սարգսյանը նշեց, որ Կանեվսկոյին և նրա թիկնապահներին անհիմն են բերման ենթարկել, քանի որ վերջիններիս մոտ պահվող զենքերն օրինական են։
«Այդ զենքերը մի քանի անգամ վերցվել և ստուգվել են»,- ասաց Հովսեփ Սարգսյանն՝ ընդգծելով, որ ամբողջ անցած տարվա ընթացքում այդ զենքերը պարբերաբար ստուգվել են։ Բացի այդ՝ Կանեվսկոյը նույն զենքերի համար պարբերաբար բերման է ենթարկվել։
Ավելի վաղ հայտնել ենք, որ հունվարի 6-ին ոստիկանության Կենտրոնական բաժնի քրեական հետախույզներն, իրացնելով ստացած օպերատիվ տվյալները, Կոնդի Սուրբ Հովհաննես եկեղեցու բակում հայտնաբերել ու ապօրինի զենք-զինամթերք պահելու կասկածանքով բաժին բերման են ենթարկել քրեական հեղինակության ու նրան ուղեկցող անձանց։ Կատարվել են անձնական խուզարկություններ ու մեքենաների զննություններ։ Հայտնաբերվել են դանակ ու տարբեր տեսակի հրազեններ, որոնց օրինականությունը ստուգվում է։
Նույն օրը քրեական հեղինակությունն ազատ է արձակվել։
Տեսանյութը՝ ոստիկանության