Ինձ հրավիրել էին Ազգային անվտանգության ծառայություն՝ ՀՀ վարչապետ Նիկոլ Փաշինյանի մասին կատարածս գրառումների համար. սա ազատ խոսքի սահմանափակման փորձ էր: Այս մասին Tert.am-ի հետ զրույցում ասաց ՀՀ երկրորդ նախագահ Ռոբերտ Քոչարյանի աջակից Արմեն Մինասյանը, ում ԱԱԾ հրավիրել էին հունվարի 9-ին:
«Ես գրել եմ, որ Նիկոլ Փաշինյանը խառնվում է դատական համակարգի աշխատանքին և անձնական միջամտություն է իրականացնում երկրի արդարադատությանը, որի իրավունքը չունի, գրել եմ, որ սխալ արտաքին քաղաքականություն է վարում, և որ գործակալ է»,- ասաց Մինասյանը՝ նշելով, թե ԱԱԾ-ում հարցրել են՝ ինչպե՞ս կարող է ապացուցել Փաշինյանի՝ գործակալ լինելը:
«Ես էլ բացատրեցի, որ դա իմ անձնական կարծիքն է. կարելի է նաև գործակալ լինել՝ չհավաքագրվելով: Սխալ քաղաքականության արդյունքում հնարավոր է անգիտակցաբար հայտնվել ինչ-որ երկրի գործակալական ցանկում»,- մանրամասնեց Մինասյանը՝ նշելով, թե ԱԱԾ-ում էլ արձագանքել են, որ թեև Մինասյանն իր անձնական կարծիքն արտահայտելու իրավունք ունի, բայց այդ իրավունքից մեկ ուրիշն «առիթավորվում» ու երկրի մասին վատ բաներ է գրում:
«Եթե սա լիներ նախկին իշխանությունների ժամանակ, ես մի կերպ կլռեի՝ գիտակցելով, որ նրանք մեր ազգային շահը պաշտպանում են, իսկ այս դեպքում գործ ունենք անձի հետ, որն ընդհանրապես ՀՀ շահը չի ճանաչում»,- ասաց ՀՀ երկրորդ նախագահի աջակիցը՝ ընդգծելով, թե շարունակելու է պնդել իր տեսակետները:
Արմեն Մինասյանը նշեց նաև, որ ԱԱԾ-ում ասել են, որ իրեն այնտեղ հրավիրելը որևէ կապ չունի իր քաղաքական ակտիվության հետ: «Բայց ես քաղաքականությամբ չեմ զբաղվում և միայն աջակցում եմ Ռոբերտ Քոչարյանին, և ինձ ԱԱԾ կանչելը կապում եմ քաղաքացիական գործունեությանս հետ»,- ասաց նա։
Արմեն Մինասյանը նաև կարծիք հայտնեց, թե, հավանաբար, Արթուր Վանեցյանը հրաժարական տվեց ԱԱԾ տնօրենի պաշտոնից, քանի որ պատրաստ չէր անցնել այս փուլին՝ ազատ խոսքի սահմանափակմանը: