Արցախյան ազատամարտի տարիներին Ադրբեջանը երկու հայկական քաղաքացիական օդանավ է խոցել Արցախի տարածքում: Այս մասին Analitik.am-ի հետ զրույցում նշեց ավիացիոն փորձագետ Դմիտրի Ադբաշյանը:
Նրա խոսքերով, օդանավերից մեկն ընկել է լեռներում, ամբողջությամբ այրվել, իսկ ուղևորները զոհվել են: Ինչ վերաբերում է մյուս օդանավին, ապա այն կարողացել են իջեցնել Սիսիանում: Օդանավն այրվելիս է եղել, սակայն բոլոր ուղևորներին հաջողվել է փրկել:
Արդյո՞ք հնարավոր է սխալմամբ քաղաքացիական օդանավ խոցել հարցին, Ադբաշյանը պատասխանեց. «Եթե պատահեց, ուրեմն հնարավոր է»:
Ինչ վերաբերում է նման դեպքերում փոխհատուցմանը, մեր զրուցակիցը նշեց, որ հստակ օրենք չկա, սակայն որոշակի կարգավորումներ գոյություն ունեն, որոնցից մեկը նյութական փոխհատուցումն է զոհվածների հարազատներին:
Դմիտրի Ադբաշյանը նաև հաղորդեց, որ իր հետ ևս նման դեպք է եղել. Տարիներ առաջ Ռուսաստանի տարածքում հրթիռը միայն հրաշքով չի խոցել օդանավը, որի օդաչուն եղել է ինքը. «Քիչ էր մնացել խփեին, բախտս ուղղակի բերեց: Մնացածի մասին իրավունք չունեմ պատմելու»:
Իսկ թե ինչպես կարող է նման շփոթմունք պատահել, հիմա՝ Իրանում տեղի ունեցած ողբերգության դեպքում, և իրականում ինչպես խուսափել նման դեպքերից, Ադբաշյաննասաց, որ ներկայումս ավիացիոն ոլորտի հետ կապված տեխնոլոգիաները կատարելագործված են և որևէ տարր ավելացնելու կարիք չկա, ուղղակի մասնագետները պետք է ուսումնասիրեն Իրանում տեղի ունեցածը և հետևություններ անեն:
Ըստ նրա, առաջին հերթին պետք է բարձրացնել համակարգերի անվտանգության մակարդակը և վստահությունը. «Սրանք մասնագիտական հարցեր են, որ պետք է իրականացվեն»:
«Հայաստանի պատմության մեջ նման դեպքեր չեն եղել»- հավաստիացրեց Դմիտրի Ադբաշյանը:
Հիշեցնենք՝ այսօր Թեհրանը հայտարարեց, որ հենց իրանական ուժերն են խոցել ուկրաինական օդանավը: Դա եղել է մարդկային սխալի արդյունք. օդանավն ընկալվել է որպես թշնամական օբյեկտ: