Այսօր ՛՛Տեսակետ՛՛ մամուլի ակումբում հյուրընկալվել էին ՛՛Ոչ վարկային թալանին՛՛ նախաձեռնության անդամներ Մանուել Մանուկյանն ու Արտակ Մարգարյանը և ՛՛Իրավունքի սահման՛՛ իրավապաշտպան ընկերության տնօրեն Գևորգ Հովհաննիսյանը:
Ասուլիսի թեման բանկային ու վարկային համակարգն էր, մասնավորապես՝ տվյալ ոլորտում տիրող իրավիճակը, արձանագրված խախտումներն ու բանախոսների բնորոշմամբ՝ թալանը:
Ինչպես նշեց Մանուել Մանուկյանը՝ իրենք հազարավոր, եթե ոչ՝ տասնայկ հազարներով նամակներ են ստանում քաղաքացիներից, որոնք բողոքում են, որ այս ընթացքում իրենց նկատմամբ դատական գործեր են հարուցվել:
Դիմելով ԱԺ պատգամավորներին՝ նա ասաց. ՛՛Հարգելի՛ պատգամավորներ, էլ ինչպիսի՞ փաստեր ներկայացնենք, եթե դուք գտնում եք, որ փաստեր չկան, եկեք գնանք փողոցներ, մենք ձեզ տեղեկացնում, խնդրում, հորդորում ենք, որ քաղաքացիների ցավերին գնաք ընդառաջ, հասարակ մարդը երբեք հետքայլ չի անելու, մենք այնքան ենք պայքարելու, մինչև հասնենք խնդրի արդարացի լուծման՛՛:
Մանուկյանը պատմեց, որ իրեն դիմել է մի քաղաքացի, որը Varks.am-ից 180 հազար էր վերցրել, ու արդեն 600 հազար դրամից ավելի միայն տոկոս էր վճարել և դեռ 100 հազար էլ պարտք էր: նա նշեց, որ նման իրավիճակում հայտնված մարդկանց հանդեպ ճնշումներ են գործադրում, վախեցնում են նրանց, ընդամենը մեկ վարկը մոըծելն ուշացնելու համար սև ցուցակում ընդգրկում՝ այն էլ կորոնավիրուսային այս իրավիճակում, և այլն:
՛՛Այսպիսի հազարավոր դեպքեր կան, հետո էլ ասում են՝ գյուղացին պետք է աշխատի, սա պետք է աշխատի, նա և այլն, էլ ինչպե՞ս աշխատի, սա թալան է, մենք պայքարելու ենք, մինչև արդար լուծում գտնվի, մենք նաև Գյումրի, Վանաձոր, Արմավիր ենք գնացել, հանդիպումներ ենք ունեցել բնակիչների հետ և այսօր փոխանցում ենք նրանց տառապանքը, փորձում ենք այն դարձնել հանրային, ժողովուրդը պետք է պայքարի, մինչև ամսի 31-ը հասարակ քաղաքացու վրա ժամանակ են դրել, ինչու՞ պիտի ամեն օր մարդկանց, ընդ որում՝ նաև տարեցներին, զանգեն, վախեցնեն, մենք պիտի պայքարենք, դիմում եմ իրավապահներին, պաշտոնատար անձանց: Մենք պայքարում ենք հանուն հասարակ մարդու, գյուղացու, ուսուցչի, բանվորի, տաքսիստի, մսավաճառի, սա բոլորի խնդիրն է՛՛,-նշեց Մանուել Մանուկյանը:
՛՛Իրավունքի սահման՛՛ իրավապաշտպան ընկերության տնօրեն Գևորգ Հովյաննիսյանն էլ ասաց, որ իր ընկերությունն աջակցում է ՛՛Ոչ վարկային թալանին՛՛ նախաձեռնությանը, և այս պայքարի շրջանակում իրենք գրություն են ուղարկել ՀՀ վարչապետին:
՛՛Ազգային, պետական առումով մենք գրություն ենք ուղարկել վարչապետին, և պետական իշխանության մյուս բոլոր մարմինները պետք է այս հարցով բավականին հետաքրքրված լինեն: ԱԺ-ի մեր պատգամավորներին կոչ եմ անում լսել այն մարդկանց խնդիրները, որոնք իրենց տվել են մանդատ, որպեսզի ներկայացնեն իրենց շահերն օրենսդիր մարմիններում, սակայն, ցավոք, շատ քչերն են դրանով զբաղվում: Հարգելի՛ օրենսդիր իշխանության պատգամավորներ, դուք ստացել եք մանդատ, չկա՞ն օրենսդրական բացեր բանկային ոլորտի օրենսդրության մեջ, դուք պատասխանատու եք ձեզ քվե տված մարդկանց առջև՛՛,-ասաց Հովհաննիսյանը և հավելեց, որ այս պահին դեռ վարչապետից պատասխան չի ստացվել, իսկ պատասխանը կլինի այն ելակետը, որն ուղղություն կտա, թե ինչպես են հետո կազմակերպելու հարցերը:
Իրավապաշտպանի խոսքով՝ սա մեկ կամ տասը հոգու հոգու խնդիր չէ, այլ համակարգային խնդիր է: Նա նշեց, որ բացի այն, հիմա առաջացել են միջնորդ կազմակերպություններ, որոնք սև ցուցակում հայտնված մարդկանց կարողանում են աջակցել, որպեսզի վերջիններս կարողանան վարկ ստանալ, ու այդ միջնորդ ծառայությունները գովազդվում են:
՛՛Ասում են՝ դու որ սև ցուցակում ես, ես կմիջնորդեմ, քեզ կտան, դա քո խնդիրը չէ: Հարգելի՛ ԱԱԾ, խնդրում եմ, պարզեք՝ գուցե այդ կազմակերպություններն ԱՔՌԱ համակարգը սահմանող անձանց հետ սերտ կապե՞ր ունեն՛՛,-ասաց Հովհաննիսյանը և հավելեց, որ, իր կարծիքով, սրա հետևում այնպիսի ուժեր կան, որոնց պետք է երկրում անկայունություն ստեղծել. ՛՛Մինչև ինչքա՞ն է շարքային գյուղացին կարողանալու տալ այդ տոկոսները…՛՛:
Ըստ իրավապաշտպանի՝ բանկային մանիպուլյացիաներ են տեղի ունենում, մեր երկրում գերակայում են սպառողական ուղղվածություն ունեցող վարկատեսակները, այդ գումարները չեն վերարտադրվում կրկին: ՛՛Ունիվերսալներն ասում են՝ վարկեր ենք տալիս՝ առանց անձը հաստատող փաստաթղթի՛՛,-այս համատեքստում ևս մեկ խնդիր մատնանշեց Հովհաննիսյանը:
Արտակ Մարգարյանն էլ ասաց, որ իրենց նպատակը մեկն է, որպեսզի ճիշտ սկսի կառուցվել բանկային համակարգի մեխանիզմը, որ այն հեշտ, բարվոք, նպաստավոր լինի շահառուների համար: ՛՛Մարդը տարիներ առաջ՝ իքս ժամանակ առաջ, խնդիրներ է ունեցել, հիմա չի կարողանում կարգավորել դա, ինչու՞ իր ամբողջ կյանքում քարշ տա այդ խնդիրը՛՛,-ասաց նա:
Նա նշեց նաև, որ այժմ իրենք սպասում են վարչապետի պատասխանին և պահանջում են հետևողականություն այս հարցում:
՛՛Որևէ մեկը չի ասել, որ գումարը չի վերադարձնելու, մարդիկ ասում են, որ մինչև անգամ պատրաստ են ամենաբարձր տոկոսով՝ 24 տոկոս, վերահաշվարկ անել, և վերցրած օրվանից վերահաշվարկ անել, մարդը 100 հազար վերցրել է, 600 հազար տոկոս փակել, դեռ 100 հազար էլ պարտք է, եթե վերահաշվարկ անենք, իրենք միլիոններով գումար են վերցնելու քաղաքացիներից, իրենց դա ձեռք չի տալիս, մի ամիս հետաձգելու համար մարդուց 30 հազար վերցրել են՛՛,-մանրամասնեց Մանուկյանը:
Նա նշեց, որ բանկային ոլորտի բարելավման համար չորս կետեր են հարկավոր: Առաջինը, ըստ նրա, անհրաժեշտ է ԱՔՌԱ համակարգի թարմացում, քանի որ նշված համակարգի պատճառով ծանրաբեռնված է նաև դատական համակարգը:
Որպես երկրորդ կարևոր կետ Մանուկյանն առանձնացրեց տոկոսների խելամիտ լինելը: ՛՛Տոկոսներն ահռելի են, հասել են մինչև 450, և լռություն է, բազմաթիվ կառույցների ենք ուղարկել, բայց մարդկանց լռեցնում են՛՛,-ասաց նա և հավելեց. ՛՛Երրորդը՝ արտակարգ դրության պայմաններում այն վարկային կազմակերպություններն ու բանկերը, որոնք ճնշել են ու գումար են ուզել քաղաքացիներից, պիտի փակվեն, որովհետև թիկունքից հարվածել են դժվար վիճակում գտնվող մարդկանց՛՛:
Որպես չորրորդ կետ՝ նա կրկին հիշեցրեց այն, որ քաղաքացիները համաձայն են վերահաշվարկ անելու. ՛՛Վերահաշվարկ անեն՝ մինչև այսօր, որի արդյունքում մարդն իր վերցրած գումարը վճարում է հետ, նաև դրա 24 տոկոսը, եթե հետո պարտք է, սկսում է վճարել՛՛:
Արտակ Մարգարյանն էլ նշեց, որ իրենց խնդրանքն է՝ հնարավորինս արագ լուծում տալ այս հարցերին, սահմանել կարգավորումները, որպեսզի քաղաքացիները խնդիրների առջև չկանգնեն:
Մանրամասները՝ տեսանյութում.