Սեպտեմբերի 28-ին և 29-ին Մայր Աթոռ Սուրբ Էջմիածնում տեղի կունենան Սրբալույս Մյուռոնի օրհնության և Մայր Տաճարի վերաօծման արարողությունները։ Այս միջոցառումներին, սակայն, վարչապետ Նիկոլ Փաշինյանի աշխատակազմը մասնակցելու պաշտոնական հրավեր չի ստացել։
Այն, որ եկեղեցու վերնախավի և պետության հարաբերությունները լարված են, կամ դրանք փակուղում են, գաղտնիք չէ: Քաղաքագետ Լիլիթ Դալլաքյանին ևս չի զարմացնում երկրի ղեկավարությանն այս միջոցառումներին չհրավիրելու փաստը: Վերջինս հիշեցնում է, որ եկեղեցու վերնախավն այսօր դրոշակ է դարձրել, այսպես ասած, Հայաստանը, հայ ժողովրդին «փրկելու» հարցը և հանդես է գալիս իշխանությունների դեմ:
«Դեմոկրատական երկրում իշխանությանը քննադատելը նորմալ է, ուղղակի այդ քննադատությունը միայն այս իշխանություններին է ուղղված, նախկինի վերաբերյալ ոչ մի գնահատական չկա: Իսկ երբ ասում են՝ նախկինն անցել է, ի՞նչ քննադատենք, ասեմ՝ նախկինն այսօր ներկա է, նստած է ԱԺ-ում, պարբերաբար փորձում է ՀՀ-ում սրել ներքաղաքական իրավիճակը: Ավելին՝ գաղտնիք չէ, որ ազդակներ է ստանում դրսից: Իսկ երբ ասում են՝ նախկինները գործող իշխանությունից մի քանի անգամ բարձր էին (որոնք մեծ ներդրում ունեն ՀՀ-ի այս վիճակին հասնելու և պարտության հարցում), շատ քաղաքացիներ անվստահությամբ են լցվում եկեղեցու վերնախավի նկատմամբ, և դրա հետ Նիկոլ Փաշինյանը որևէ կապ չունի»,- նկատում է Դալլաքյանը:
Նրա խոսքով՝ երբ քննադատությունները միակողմանի են և ուղղված կոնկրետ անձի, դա ոչ այնքան Նիկոլ Փաշինյանին է վիրավորում և հեղինակազրկում, որքան եկեղեցուն. «Որովհետև ժողովուրդն ասում է՝ լավ, դուք ի՞նչ եք առաջարկում: Նիկոլ Փաշինյանը մեղավոր է, հեռանում է, դուք ո՞ւմ եք պաշտպանում, ո՞վ է գալու, ճանապարհային քարտեզը ո՞րն է: Ասում ենք՝ ո՞վ է գալու, ձայն չկա, այսինքն՝ նախկիննե՞րն են էլի գալու: Եթե այդպես է, ժողովուրդն իր գնահատականը վաղուց տվել է նրանց»:
Ըստ Դալլաքյանի՝ եկեղեցին վստահություն չի ունեցել նույնիսկ մինչև 2018 թվականի հեղափոխությունը, և քանի դեռ ռուսական նարատիվներն է առաջ տանում, ավելի կխորանա այդ անվստահությունը՝ հավելելով, որ ժողովուրդը, իշխանություններին լսելով չէ, որ հիասթափվում է եկեղեցու ղեկավար դասից, այլ նրանց դիրքորոշման պատճառով է:
«Այսօր ասում են, որ մեր գլխավոր դաշնակիցը ՌԴ-ն է, պետք է խորացնենք հարաբերությունները: Ուղղափառ եկեղեցին միշտ էլ եղել է քաղաքական գործիք, իհարկե, մենք Հայ առաքելական եկեղեցու անդամ ենք, սակայն այն, որ եկեղեցիները, օրինակ՝ նույն Ուկրաինայում, միշտ եղել են քաղաքականացված, փաստ է: Իրենք չեն էլ թաքցնում այդ կապը, երբ ՌԴ-ից ասում են՝ մենք կանգնած ենք եկեղեցու, Հայոց հայրապետի կողքին: 2-րդ նախագահն ասել էր, որ հոգևորականը պետք է առաջնորդի նոր շարժումը, իսկ դա նշանակում է, որ նրանք ունեն ընդհանուր կապ, և իրենք էլ ասում են՝ նախկինները ձեզանից բարձր են»,- ասում է նա:
Դալլաքյանը եկեղեցու ղեկավար դասի և պետություն հարաբերությունների հանգուցալուծում չի տեսնում: Ըստ նրա՝ այդ հարաբերություններն էլ ավելի են սրվելու՝ միաժամանակ նշելով, որ դա կախված է Ռուսաստանից. «Եթե ՌԴ-ն գնա իրավիճակի սրման, եկեղեցին այդտեղ ունենալու է իր դերը, բնականաբար, չի գնալու հաշտեցման իշխանությունների հետ»:
Զրուցակցի համոզմամբ՝ սա ոչ այլ ինչ է, քան լյուստրացիա. բոլորն ընտրել են իրենց կողմերին և տեղավորվել «հարազատ» ուժերի կողքին:
Խոսելով հոգևորականի կարգավիճակը սառեցրած, վարչապետ դառնալու մեծ ցանկություն ունեցող Վազգեն (Բագրատ) Գալստանյանի մասին՝ քաղաքագետն ասում է՝ հասկացել են, որ ընտրություններով նախկինները հնարավորություն չունեն վերադառնալու, դրա համար պայքարի այս մեթոդն են ընտրել:
«Լարվածություն մտցնել, «Մարտի 1»-ին նմանեցնել հունիսի 12-ի՝ ԱԺ-ի դիմաց տեղի ունեցած դեպքերը: Փորձում են սրել իրավիճակը՝ անընդհատ ասելով՝ 2 օր է մնացել, այսինքն՝ իրենք հասկացել են, որ ընտրություններով ոչ մի շանս չունեն, դրա համար 2026-ին չեն սպասում, այլ սպասում են հստակ ազդակի, չեն էլ հերքում, ասում են՝ ապստամբության ենք պատրաստվում: ՀՀ հնարավոր դիվերսիֆիկացիայի պարագայում ՌԴ-ն իր բոլոր ականներն այստեղ պայթեցնելու է: Եթե հաջողության հասնեն Ուկրաինայում, կթեքվեն Հարավային Կովկաս. Ալիևին կհրահրեն, այս ուժերն էլ կլինեն այն գործիքը, որի միջոցով հրահրում կլինի նաև երկրի ներսում»,- ասում է Դալլաքյանը:
Հարցադրմանը՝ կարո՞ղ ենք ասել, որ ականներից մեկը եկեղեցին է, վերջինս պատասխանում. «Եկեղեցին չէ, եկեղեցու ղեկավարությունն է, որն իր քայլերով առնվազն կասկածի տեղիք է տալիս, որ սպասարկում է ոչ թե Հայաստանի, այլ ուրիշ երկրների շահերը, որտեղից էլ մեդալներ ու շնորհավորանքներ է ստանում մարդկանցից, որոնք ակնհայտ հակահայկական գործունեությամբ են զբաղվում»:
medianews.site