1992 թ-ից սկսած՝ բոլոր հետագա տարիներին, այդ ժամանակաշրջանի ընդդիմությունը սեպտեմբերից առաջ խոսում է աննախադեպ թեժ աշնանից։ Այս մասին «Փաստինֆոյի» հետ զրույցում ասաց քաղտեխնոլոգ Արմեն Բադալյանն՝ անդրադառնալով սեպտեմբերին ընդդիմության կողմից վերսկսելիք ակցիաներին։
Դիտարկմանը, թե ողջ ամառվա ընթացքում ընդդիմությունը հանդիպումներ է ունեցել, պատրաստվել է, առաջիկայում էլ 10 000-անոց ակտիվի հետ հանդիպում է նախատեսվում՝ նա պատասխանեց, որ այս անգամ էլ լինելու է նույնը, ինչ նախորդ բոլոր 35 սեպտեմբերներին։
«35 տարի շարունակ, բոլոր ամառների ընթացքում ընդդիմությունը հանդիպումներ է ունեցել, հավաքներ է արել, «Մարտի 1-ից» առաջ անգամ 120 000-անոց հանրահավաք է եղել ու մշտապես էլ ընդդիմադիրներն ասել են՝ թե տեսեք այս անգամ ինչ թեժ աշուն է լինելու, բայց ոչինչ էլ չի եղել, հիմա էլ ոչինչ չի լինելու։
Բանն այն է, որ իշխող քաղաքական համակարգը, անկախ նրանից, թե ով է դրա ղեկավարը երբեք փողոցի ճնշմամբ զիջումների չի գնացել ու երբեք փողոցի ճնշմամբ չի տապալվել, եթե 35 տարի շարունակ նույնն է եղել, անգամ երբ հասարակությունն ավելի ուժեղ է եղել, ապա ինչու պետք է հիմա՝ 36-րդ տարում այլ կերպ լինի։
Իհարկե, կարելի է 1 տոկոս թողնել ֆորս-մաժորային իրավիճակին, բայց եթե այդ ֆորսմաժորը չլինի, ապա, պնդում եմ, փողոցի ճնշմամբ Հայաստանում չի կարող իշխանափոխություն լինել,- ասաց քաղտեխնոլոգը։
Դիտարկմանը, թե Բագրատ Սրբազանը խոստանում է, որ 2026-ի հերթական ընտրություններին չենք հասնելու և լինելու է այն, ինչին բոլորս սպասում էինք մայիսի 9-ին՝ Ա. Բադալյանը նշեց, որ բազմաթիվ անգամներ ընդդիմության ղեկավարները խոստացել են, որ հերթական ընտրություններին չենք հասնելու, այլ լինելու արտահերթ ընտրությունների։ «Մի տարբերություն կա, նրանք աշխարհիկ գործիչներ էին, իսկ հիմա Բագրատ Սևրբազանը եկեղեցական գործիչ է։ Քաղաքական համակարգն Հայաստանում այնպիսին է, որ սովոր է փողոցի ճնշումներին դիմակայել և հաղթել։
Իշխանափոխության հասնելու համար այլ ճանապարհ է պետք գտնել, որովհետև շարժումների սկզբում միշտ շատ մարդ է հավաքվում, հետո, ամեն բան դառնում է սովորական։ Օրինակ, հիմա էլ ասենք՝ եղավ հանրահավաք 50 000 մարդկանցով, հետո՞, ինչ են անելու, ասենք կառավարության շենքը գրավեցին, և՞ .. երկրի քաղաքական համակարգը հենված չէ վարկանիշի, հեղինակության վրա, որ ասեն՝ տասնյակ հազարավոր մարդիկ դուրս եկան ու սա նշանակում է, պետք է գնանք ինչ որ գործողությունների։ «Մարտի 1-ից» հետո 70 հազար մարդ էր դուրս եկել փողոց և ի՞նչ»։
Անդրադառնալով Սահմանադրական փոփոխությունների խորհրդի քննարկելիք առաջարկությանը, որը վերաբերում է խորհրդարանական մեծամասնության հոդվածի փոփոխությանը՝ նա նշեց, որ իշխող խմբակցությունը հասկանում է, որ չունի այն վարկանիշը, որ ուներ 2018-ին, 2021-ին, և դրա համար էլ որոշակի փոփոխությունների է գնում, որպեսզի հնարավորություն ստանա կոալիցիոն իշխանություն ձևավորելու։ «Բայց մինչև 2026 թիվ սպասենք՝ հետո այդ մասին կխոսենք, մինչև 2026 դեռ շատ հարցեր ու խնդիրներ կան, որոնք կարող են իրապես ազդել ընտրական գործընթացների վրա»։