Արցախահայության հարցերի լուծման հարցում մենք պահանջատեր ենք, ներկա իշխանությունը՝ պատասխանատու։ Այս մասին, այսօր՝ հունիսի 19–ին, կառավարության դիմաց լրագրողների հետ զրույցում նշեց «Վերածնվող Արցախ» շարժման համակարգող, Արցախցիների իրավունքների պաշտպանության խորհրդի անդամ Անաստաս Իսրայելյանը։
Նա հիշեցրեց, որ երբ իրենք մեկ ամիս վրան էին խփել Ազատության հրապարակում, այդ ընթացքում կառավարությունից եղել է առաջարկ, որ մեկ ամսով կերկարաձգեն 40+10 հազար դրամի աջակցությունը, դրա դիմաց պետք է արցախցիները հանեն վրան։ Երբ չեն համաձայնել, կառավարությունը առաջարկել է երկու ամսով երկարաձգել. ««Առևտրի առարկա էին սարքել, մենք ասել ենք ոչ, սոցիալական աջակցությունը պիտի լինի անժամկետ։ Իրենց կողմից, ուրեմն, եղել է այսպես ձևաչափ. մենք ձեզ խոսք ենք տալիս, որ բոլոր այդ հարցերը պատրաստ ենք քննարկելու ու բարեփոխելու այն կարևոր կետերը, որ արցախահայության համար հասանելի լինի, որ կարողանան ինտեգրվել Հայաստանի ժողովրդի հետ։
Հարգելի արցախահայություն, ձեզ բոլորիդ խաբել են, որ այդ շարժումը լուծարեն, թուլացնեն։ Այն խմբերը, որ հանդիպել են իշխանության ներկայացուցիչների հետ, բոլոր այն կարևոր կետերը, որ սկզբնական շրջանում խոսք էին տվել, որ անդրադառնալու են ու բարելավելու են, այդ կետերը չեն փոխվել։ Կառավարության ասած երկու ամիսն անցել է ու էլի մարդիկ հայտնվել են նույն վիճակում, որ կանգնած ենք արտագաղթի վտանգի առաջ»,–ասաց նա։
Հարցին՝ ի՞նչն է խանգարում, որ արցախիցները նորից ակտիվ պայքարի անցնեն, վրաններ տեղադրեն, Իսրայելյանը պատասխանեց. «Ոչ մի բան էլ չի խանգարում, բացի անձերից, որոնք իմ համոզմամբ, համագործակցում են իշխանության ներկայացուցիչների հետ, մոլորեցնում են մարդկանց։ Արցախցիների մեջից էլ կան այդպիսի մարդիկ։ Ես հայտարարությամբ Արցախցիների իրավունքների պաշտպանության խորհրդից դուրս եմ եկել ու պատճառներն էլ ներկայացրել եմ։ Մնացած մարդիկ էլ թող այդ համարձակությունը ունենան, դուրս գան կամ էլ ասեն՝ ինչ է կատարվում»։
Անաստաս Իսրայելյանը հայտարարեց, որ կառավարությունը միայն կոսմետիկ փոփոխություններ է արել, իսկ հիմնական պահանջը՝ անժամկետ շարունակել սոցիալական աջակցությունը բոլորի համար, չի կատարվել. «Վերցրել են փախստականների, ցեղասպանությունից փրկված ժողովրդի մեջ տարանջատման պրոցես են մտցրել, ասում են՝ այս մարդիկ խոցելի խումբ են, դրանց ուշադրություն ենք դարձնում։ Ի՞նչ խմբի մասին է խոսքը գնում, ցեղասպանությունից փրկված 150 հազար մարդ կա ձեր մեղքով, ձեր սխալներով, ձեր բացթողումներով հասել էդ իրավիճակին։ Բոլորին հավասար էդ հարցի լուծումները պետք է տան։
Արցախցիներին ասում են՝ 40000–ը, շատ է, բերեք 30 հազար տանք, չէ, բայց 30-ն էլ է մի քիչ շատ, բերեք 20 տանք։ Էս ի՞նչ չեք անում, ձե՞ռ եք առնում էս ժողովրդին, որը տուն, տեղ ու հայրենիք է կորցրել, ինչի՞ եք հասցնում։ Սա արտագաղթին ուղղված քայլեր են, այնպես են անում, որ ժողովուրդը թողնի,, գնա մար Հայաստանից։ Մենք էլ չենք ուզում, մենք ուզում ենք այստեղ ապրենք, սա մեր հայրենիքն է»,– ընդգծեց նա։