Իրավիճակը շարունակում է գերլարված մնալ իսրայելալիբանանյան հատվածում։ Բեյրութի հարավային արվարձանում իսրայելական ինքնաթիռները հարվածներ են հասցրել «Հեզբոլլահի» բարձրաստիճան հրամանատարին: Իսրայելական բանակը հայտարարել է, որ դա պատասխան է երեք օր առաջ անդրսահմանային հրթիռակոծության, որի հետևանքով զոհվել է 12 երեխա և դեռահաս:
Լրագրող Սագո Արեանն ուշի ուշով հետևում է զարգացումներին։
«Լարված իրավիճակը կապված է Իսրայելի Գոլանի «Մաժտըլ շամս» շրջանում տեղի ունեցած վերջին զարգացումների հետ։ Գոլանի շրջանի հրթիռակոծության հետևանքով 1 տասնյակից ավելի երեխաներ են մահացել։ Իսրայելն առիթը բաց չթողեց մեղադրելու և դատապարտելու լիբանանյան «Հեզբոլլահին»։ Իսկ «Հեզբոլլահը», որ վայելում է Իրանի ամբողջական նեցուկն ու աջակցությունը, արագորեն հերքեց, որ իրենք կրակ են բացել Գոլանի ուղղությամբ։ Բենիամին Նեթանյահուն, որ գտնվում էր Վաշինգտոնում, կիսատ թողեց այցն ու վերադարձավ Թել Ավիվ, որից հետո իսրայելցի պաշտոնյաներն իրար հերթ չտալով ծանր քաշի հայտարարություններ արեցին, որ «Լիբանանը պետք է այրվի», ««Հեզբոլլահը» պետք է խստագույնս պատժվի», և որ իրենք չեն լռելու»,- MediaHub-ի հետ զրույցում նշում է Արեանը։
Այդ հայտարարությունից 3 օր անց իրավիճակը կտրուկ լարվել է։ Ըստ Արեանի՝ դա ավելի շատ նկատելի էր այն բանից հետո, երբ ազդեցիկ երկրները հայտարարություններով իրենց քաղաքացիներին հորդորեցին արագորեն լքել Լիբանանը, իսկ ԱՄՆ հայտարարեց, որ եթե քաղաքացիները, այնուամենայնիվ, մնում են Լիբանանում, ապա պետք է ցուցաբերեն զգուշություն։
«Լիբանանի միջազգային օդանավակայանը հայտնվեց անդամալույծ վիճակում։ Հարյուրավոր մարդիկ սկսեցին լքել Լիբանանը։ Այս ամենի ֆոնին երկրի կառավարությունը հատուկ առողջապահական ծրագիր է մշակել՝ արտակարգ իրավիճակում հատուկ գործողություններ կատարելու»,- նշեց նա։
Մեր զրուցակիցը ռազմական գործողությունը հավանական է համարում, իսկ մեծ պատերազմ՝ ոչ։
«Ընդհանուր պատկերն այն է, որ Իսրայելը կշարունակի թիրախավորել Լիբանանի կարևորագույն օբյեկտները, այդ թվում՝ «Հեզբոլլահի» զինանոցները, ճանապարհային հանգույցները և այլն։ Իսրայելի հարվածների նպատակն աղմուկ և խուճապ առաջացնելը կլինի։ Այս առումով Բեյրութը, նրա մարդաշատ հատվածները, օդակայանը պետք է զերծ պահել հավանական հարձակումներից։ Սարսափ տարածելու կամ վախ ապրելու կարիք չեմ տեսնում։ Պարզապես լիբանանցիներն ու նաեւ լիբանանահայերը, հարկավոր է, լինեն ավելի զգոն և ուշադիր իրենց տեղաշարժի առումով»։
Այս ամենից բացի, Լիբանանը գտնվում է տնտեսական խորը ճգնաժամի մեջ։ Երկրի բնականոն կյանքը վաղուց խաթարվել է։ Արեանը մտահոգվում է նաև հայկական համայնքի ճակատագրով։ Իսրայելալիբանանյան դեպքերի կիզակետը թեպետ հեռու է գտնվում հայկական շրջանակից, սակայն, չի բացառվում, որ մայրաքաղաք Բեյրութը ևս կառնվի թիրախի տակ։
«Բայց այս փուլում ես բացառում եմ ռազմական խոշորամասշտաբ հարձակում, փոխարենը մտավախություն կա, որ արտագաղթի նոր ալիք կհասունանա Լիբանանում, որն էապես ազդելու է երկրի կայունության վրա»,- հավելեց լրագրող Սագո Արեանը։